Rubalcaba quere cederlle máis soberanía á UE

Como se fora pouco o que mandan facer desde Europa, o candidato socialista á presidencia do goberno quere cederlle aínda máis soberanía estatal á Unión Europea, para que desde alí dirixan a política económica do Estado sen os intermediarios do Ministerio de Economía.

Desde que en 1986, gobernando Felipe González, o Estado Español entrara a formar parte da daquela CEE, en Galiza sabemos moi ben o que é aplicar ao ditado as políticas económicas e sociais desta Europa dos mercaderes. Sabemos moi ben as consecuencias que tivo para nós os galegos e galegas as políticas económicas para desmantelar os estaleiros, o agro, a pesca, ... e todos os sectores produtivos nos que Galiza era punteira.

Supoño que non é casual esta proposta, non hai moitos días o Ministro de Economía alemán pediu que todos aqueles países rescatados economicamente deberían ceder parte da súa soberanía. E a estas alturas, segundo o oráculo dos mercados, o Wall Street Journal, o Estado Español xa non é dono do seu destino económico.

Ese é o futuro que nos agarda, se non lle poñemos remedio!; se como colonia de España non pintamos nada, como subcolonia de Alemaña desapareceremos como pobo irremediabelmente.