Galiza ten dereito!

O 1 de decembro de 2002 milleiros de galegos e galegas encheron as rúas de Santiago de Compostela co berro unánime de Nunca Máis clamando contra o desleixo do PP de Fraga que abandonou á súa sorte o noso país mentres este se enchía de chapapote de norte a sur.

Ou sen ir tan atrás; aí quedan as manifestacións de Queremos Galego, tanto a do 18 de outubro, como a histórica do 21 de xaneiro de 2010, que encheu até rebentar a Praza do Obradoiro, nunha demostración de dignidade deste pobo como poucas se teñen visto, clamando polos dereitos do noso idioma.

Agora o 13 de marzo, este domingo, temos outra cita coa historia, temos outra cita coa nosa dignidade como pobo. Logo de soportar reconversións industrias e gandeiras, logo de ver como expolian os nosos ríos e os nosos montes para beneficio de grandes empresas electrícas, sen que o noso pobo vexa un can, logo de ver como se acumulan milleiros de parados e paradas no debe do PP de Feijoo, logo de ver como privatizan a nosa caixa de aforros, que no canto de investirse os seus beneficios no noso pobo irán parar aos petos dos millonarios da revista Forbes. Por todo isto temos que berrar máis algo que nunca que Galiza ten Dereito!, polo emprego, polo aforro, polo noso País, o domingo 13 de marzo, todos e todas a Santiago de Compostela.