Pode quebrar un país?

Eu teño as miñas dúbidas. Mesmo diría que non, que é imposíbel. Outra cousa é que a débeda sexa doada de colocar, é dicir, que os mercados compren a débeda soberana a un prezo razoábel. E no caso do Estado Español non o está sendo, están apretando até o indecente para, non só que este realice aquelas reformas que lle interesan ao mercado, senón conseguir un prezo que roce a avaricia tendo en conta que o BCE dálle cartos ao sistema financeiro ao prezo case regalado. De aí que o paquete de medidas aprobadas hai unhas semanas pola UE, co inestimábel colaboración do FMI, non sexan para axudar a Grecia ou a calquera outro país en apuros, sexan para axudar ao sistema financeiro.

Pois o risco de que o Estado Español “quebre” ou que non sexa quen de colocar a débeda soberana para seguir financiándose é real. Hai uns días chegou ás miñas mans unha ligazón que cualifica o risco de quebra do Estado Español en Defcon 2. Xa sei que é un termo moi peliculeiro, que nos filmes da Guerra Fría, era o estado de máxima alerta no que se colocaban as forzas militantes previas a unha confrontación nuclear.

Os “mercados” deron un aviso con Grecia, e o seguinte na lista é o Estado Español. En fin, que isto ponse interesante, vamos a ter un verán quente, aínda que para o martes 8, data prevista de folga xeral no funcionariado, haxa certo enfriamento, certa indiferencia, mais é importante que este primeiro aviso aos mercados e ao goberno do PSOE sexa tan contundente que o obrigue a pensarse as próximas medidas a tomar.